مساحة

اجعلوها بعوده

2011-05-17T18:26:00.001+03:00

اليوم دمّعت ودرت وجهي عشان ماحدا يشوفني.. دمّعت لما سمعت الجولاني الأصيل بقول للفلسطيني الراجع "الله محييك" .. رجعت حضرت الفيديو كمان مره وحاولت أمسك حالي بس ما قدرت.. ورجعت كمان مره دمّعت!! آه دمّعت بس دمعه عن دمعه بتفرق.. هاي كانت دمعه أحلى من ألف ضُحكه! بعرف انو اللاجئين مش نايمين بصفد الليله وطالعين بكره على حيفا، بس رمزية اللي صار مش بسيطه، اللي صار خلانا نحس شو يعني الحق يرجع، اللي صار خرس كل واحد بقول فش عودة، اللي صار أسقط كل حل ما بشمل عودة كل لاجيء على قريته ومدينته.

اليوم سقط شهداء، بس اليوم كمان سقط الخوف وسقط الحد وسقط الواقع وسقط التفريط وسقط الخنوع وسقط التوطين وسقط بلفور،اليوم سقط قلبه لهرتزل، وسقط الحلم، حلمهم بأنا ننسى وحلمنا بأنا نرجع، إحنا بطلنا حالمين وبطّلنا نقبل بكلمة حلم! الرجعه مش حلم، إحنا اليوم نقلنا الحلم لأمل وصرنا نعرف شو العمل.. اليوم عرفنا لشو إحتفظنا بالمفاتيح مع إنو الباب إنخلع والبيت إنهد، هاي المفاتيح الحديد الكبيره خليناها معانا عشان نخلع السياج، عشان نفتح باب بالحدود، وعشان نتعكّز عليها وإحنا بنشعبط على تلال المجدل.

بعد اليوم ما تتوقعوا تشوفوا مسيره في عمّان ولا دمشق ولا بيروت، المسيرات بس عالحدود، واللي ما دخل اليوم بدخل بكره، واللي ما شارك اليوم رح يشارك بكره، منظر اللاجيء وهو بقطع الحدود رح يلهم كل المستضعفين، الكل رح يتمنى يعيش التجربه، حتى إحنا اللي بالداخل رح نتمنى لو نطلع ونرجع معهم، يا الله ما احلاها العودة يا عالم، يا الله ما احلاها كلمة الله محييك من أخوك اللي حافظ على أرضك وقبر جدك والحجر اللي تاركه علامه على وين كان بيتك، يا الله ما أحلى العلم لما يتخيط بدمشق ويتعلق على بيت بوادي الصليب بحيفا، يا الله ما أحلاها قعدة الختيار بالحطه البيضه ومفتاحه بأيده وبراجع باوراق الطابو، يا محلا الحق لما بيرجع وبيرجّع معه إصحابه..

تخيلوا إنو كل اللي صار واللي شاركوا ما بييجو آلاف، كيف لما المره الجاي ييجوا بميات الالوفات، كيق شكل المليون عالحدود، حدا قادر يتخيل؟! حدا قادر يتخيل حالة المسؤولين العسكريين الإسرائيليين الليله؟! حدا قادر يتخيل الرعب اللي صايب كل حدا ساكن في بيت مش هو اللي بناه؟! يا جماعه هاي المعادلة الجديدة اللي حطوها التوانسه وطبقوها المصريين ما إلها حل. معادلة بمتغير واحد صعب تحلها، كيف معادله ب 300 مليون مُتغير؟!

فش رجعه لورا، خلص، مش رح نستنى صلاح الدين، مش رح نفرك المصباح ونستنى المارد، فش مارد، إحنا المارد، ومش مضطرين نكتفي بتلت امنيات، بنفع نحقق الف طول ما إحنا منمشي كل مليون مع بعض، المليون لما بطلع ياخد حقه، حتى الجبال بتركعله، هيك طلع الحل وإحنا كاينين نضيع وقتنا دعاوي وشمع وصلاة بلكي السما بتشفق علينا، بلزمناش حدا يشفق علينا، كل شي بدنا إياه رح يصير، وهدول الفهمانين تبعون مستحيل وبنفعش بديش اسمعلهم صوت. المستحيل الوحيد اليوم إنو نرجع زي قبل.

مع كل هذا الفرح واليقين بأنو العوده قريبة ومع إنو مش وقته بس لازم أنوّه لشغله، في عز دين الميمعه، والمسيرات عالحدود والشهدا بتسقط واللاجئين بقتحمو السياج كانت قيادتنا السابقه ممثله بالرئيس أبو مازن مجتمعه مع رئيس الفيفا السيد جوزيف بلاتر وأصدرت التصريح التالي :

"لدى استقباله بلاتر: السيد الرئيس محمود عباس يثمن الدعم الذي يقدمه الفيفا للرياضة الفلسطينية التي شهدت ثورة حقيقية، تمثلت بوجود دوري للمحترفين، ودوري للكرة النسوية، وأنظمة وقوانين دولية تحكم اللعبة الشعبية."

أظن مش محتاجه سخريه ولا تعليق ولا أي نوع من الأهتمام حتى!! بس حطيتها عشان تفهموا ليش قلت القياده السابقة! هيك قياده رياضيه وإنسانية وعندها إهتمامات بالكره النسوية ما بتليق بهيك شعب همجي عم بخلع سياج وبصيّح وبضرب حجار عالناس! آه وكمان شغله، تلفزيون فلسطين كان بنقل مباراه! بس ربُنا الله المباراه ضمن بطولة النكبه!! يعني عشان ما أظلم حدا!! أي يخرب بيتكم!! ولكم استحى التلفزيون السنغالي يعرض مباراه اليوم! إستنوا بس.. بعد التحرير والله لأقلبوا قناة تعليم طبخ.. بتشوفوا!!

بس قبل ما أنهي، مع إنو قيادتنا ما فهمت شو بصير وطلع أبو مازن بعد ما خلص مع بلاتر أو قبل مش عارف وقال المصالحة هي الطريق لتطبيق حل الدولتين!! مع ذلك نتنياهو فهم الدرس ووصلته الرساله منيح كتير، نتنياهو اليوم قال: ما حدث اليوم يثبت أن الصراع على إسرائيل وليس على مناطق ال67.. ممتاز حَ بيبي نتنياهو، هيك بديت تفهم علينا، وبما إنك فهمت إرفعلك تلفون لشريكك بالسلام وفهمه القصة اذا ما فيها غلبه، وبالمره شوف إذا بتروحوا مع بعض تحضروا نهائي أبطال أوروبا آخر الشهر بلندن، أكيد بلاتر أعطاه أكم تذكره ببلاش دعماً للثورة الكروية الفلسطينية! صحيح حدا انتبه إنو أبومازن قال ثورة!!؟؟؟ حتى لو كرويه المهم ثوره !!!

نرجع للمهم..

يعني مع زعلي عالشهداء بس كان يوم من أروع أيام حياتي، وأظن إنو القصه بآخرها، 63 سنة كانوا كافيين وزياده، خلص شوفوا غيرنا إحنا إكتفينا..

أخيراً..أحبائي العائدين، شهداءاً وأحياء، ما تطولوا علينا الغيبة، إحنا بنستناكم هون لحتى نزينلكم بيوتكم، ونعمل صف دبكة من الجولان لبير السبع.. ونقلكم على طووول صوتنا.. الله محييكم..

كشف المكشوف

2011-01-29T21:18:00.001+02:00

حابب أبدأ هادا المقال بأعلان هام، يا جماعة الخير أنا كمان عندي وثائق سرية رح أرفقها بالمقال، الوثائق هاي بتهم كل سكان هذا الكوكب، الوثائق أكيده وفيها معلومات مش بسيطة، وتم تهريبها من وكالة ناسا لعلوم الفضاء، إستعدوا للمفاجئة..

الوثائق بتقول إنو الأرض مدورة وبتلف حول الشمس وحول نفسها!!

ما حدا يقولي بلا بياخة، صارلكم أكم يوم مصمودين قدام الجزيرة وبتسمعوا أبيخ من هيك، لا وبتتفاجؤوا! وما بتناموا الليل وانتو تفكروا معقول؟؟ معقول السلطة تنازلت عن حق العودة؟ معقول تنازلوا عن مستوطنات القدس وحارة اليهود؟ معقول يا ناس إنو السلطة الوطنية المعروفة بمواقفها المبدأية واللي ما بتلتقي بالأسرائيلي إلا في ساحات الوغى، بتنسق أمنياً؟!

وا أسفاه على خلايا مخكم اللي تِلفت في هالأكم يوم، وا أسفاه على وقتكم وستاتوساتكم اللي ضاعت سُدى، ويا حسرة قلبي على رموزكم الوطنية اللي إنهارت. القائد المغوار صائب عريقات طلع مفاوض!
وإنتوا كل فكركم إنو الزلمة بطلع على أوروبا عشان ينسق مع القوى الثورية في العالم! فعلاً صدمة، الله يكون بعونكم، ويجعلها خاتمة الأحزان يا رب.

وكلوا كوم والشيخ جرّاح كوم تاني! كيف بتنازل عن هيك حي مقدس وطنياً، شو مفكرها القسطل ولا عين كارم ولا دير ياسين حتى يتنازل عنها؟ هاي الشيخ جرّاح، هاي للي ما بعرف تاريخ، كان المفروض يبنوا الأقصى فيها بس عشان الأرنونا فيها غالية وصعب يطلع فيها رُخص بُنا غيروا الموقع وبنوه بالبلدة القديمة!

بس مع هيك، هناك ضوء في آخر النفق، بعدو في ناس واعيه بين أبناء شعبي، طبعاً الحكي هون عن الفطاحل اللي إنتبهوا على المؤامرة وتركوا كل الأحداث والحكي اللي ما إلو طعمه عن اللاجئين والتنسيق والقدس وغيره من المواضيع التافهة وركّزوا على الموضوع الأساسي: قناة الجزيرة! ما هي مصلحة الجزيرة من نشر هذه الوثائق وفي هذا التوقيت بالذات؟ أبو مازن محاصر بالمقاطعة، وقوات الأمن الفلسطينية في الخنادق، والقصف المتبادل شغّال على جنب وطرف، ورام الله ما بتنام، مش من الحفلات لأ، من الغارات الجويه وطلعات ال ف-16 طول الليل! وهاي القناه العدوه عم بتضعضع جبهتنا الداخلية ونحن على أبواب النصر.

بدي أرد أولاً على مهاجمي الجزيره، للتوضيح فقط أنا مش من معجبين الجزيرة وأجندتها واضحة بالنسبة إلي، وتوجهاتها ومين بتدعم على حساب مين كمان واضحة، بس هادا لا يمنع إني أوافقها لما تثير قضية مهمه وتعيد للواجهة قضايا وطنية لا تخضع من وجهة نظري لمعادلات الوقت المناسب، فش وقت مش مناسب للحديث عن اللاجئين، كل زمان ومكان مناسبين للحديث عن اللاجئين وحق العودة، وكل إحترام لكل قناة مين ما كانت بتذكرنا بحق العودة ولو كان التلفزيون الأسرائيلي نفسه، وكل من يجد إنو إثارة هيك قضية هدفها ضرب القيادة وشرعيتها بكون هو وقيادته بلا شرعية، واللاجئين همّه الممثل الشرعي والوحيد للشعب الفلسطيني مش إنت. ولكل اللي جرّب يحوّل إهتمام الناس عن الموضوع الأساسي ويخليهم يوجهوا غضبهم عالجزيرة وأجندتها نصيحتي إلك جرّب غيرها، أنت عامل زي اللي بسرق وبس ينمسك بقول هادا اللي مسكني طول عمرو بكرهني! يا أخي بعرف إنو بكرهك، ومستنيك على زلّه، وأقولك يلعن أبوه بكندره، وأنا كمان بكرهه، بس ما أنت حرامي!

أما عن القضايا اللي أثيرت فمش شايف سبب للضجة اللي صارت، مع أني مبسوط إنو الناس إنتبهت عالكارثة اللي بسببها حل الدولتين، شو بتتوقع من هيك حل؟

خلينا نبدأ بموضوع موضوع : أولاً القدس، لكل اللي بعرف القدس وسمع عن الخرايط وعمل حالو موضوعي وواقعي وقال إنو مستحيل إسرائيل تسلّم جيلو ومعالي أدوميم وبسجات زئيف والتله الفرنسية والشيخ جراّح وأجزاء من البلده القديمة وأجزاء من سلوان، وبناءً عليه بدهاش مزاودات عالسلطة! شو ضل من القدس عشان ناخده مع العلم إنو القدس الشرقية بكل مساحتها أقل من تلت مساحة القدس! أي لو بيعطوك الشرقية كلها بضل قليل بجانب تنازلك عن عين كارم والقسطل ودير ياسين والطالبية وغيرها! هادا مش حل واقعي! هادا حل أمر واقع. أما اللي مقتنع بتقسيم القدس لشرقية وغربية ومقتنع إنو أسود السلطة لن تتنازل فيا ريت يمر من المحلات المذكورة ويشوف إذا في أمل تنسحب منها إسرائيل! وبدال ما يضيع وقته وهو بهاجم الجزيرة يروح يجهزآرمة مكتوب عليها "جامعة القدس العربية" عشان نعلقها عالجامعة العبرية! لأنو كيف سمعت إنو اٍسرائيل قاعده بتحمّل بالمكتبة والكمبيوترات وكلها أكم يوم وبتكون الجامعة إلنا بعون السلطة الوطنية الصامدة، بس هاي المعلومات برضه سريّة فخليها بناتنا لحد ما يعلنوا عنها بتلفزيون فلسطين، بدناش إحراج للوفد الأسرائيلي الله يسعدكم.

تانياً موضوع التنسيق الأمني، عندي عليه تعليق واحد لكل المتفاجئين: صباح الخير.

تالتاً موضوع تبادل الأراضي، السلطة بدها تعطيهم بالقدس والضفة وتاخد على حدود غزة، صحرا يعني، وعلى قولة ياسر عبد ربه إنو القطاع في أزمة سكانية وإحنا عنا نظرة إستراتيجية فلازم نزيد مساحة القطاع! يا عبد ربك بحياة ربك قديش بدك تزيد مساحة القطاع؟ بدك تزيح الخط خمسة كيلومتر لبرّه؟ أكم سنة بتحل المشكلة، قصدي بتأجلها؟ عشر سنين؟ العشر سنين يا زرقاء اليمامة ما بسموهم إستراتيجيا، هدول يا دوب تكتيك! بس لو أنك تطرح حل الدولة الوحدة بطلع من القطاع ال70% اللاجئين وبعمروا قراهم المهجورة، أو ما بطلعو، همه حُرّين بس بقدر القطاع يضل يكبر ليوصل البحر الميت! هاي بسموها إستراتيجيا ولا شو رأيك إنت؟

رابعاً موضوع تسليم المثلث، أسوء إشي ممكن يحدث في إطار حل الدولتين هو تسليم المثلث، لأنه رح يضعف من تبقى من فلسطينيين في حدود أسرائيل بسبب قلة عددهم، وهيك إسرائيل بتكون خلصت من كل مشاكلها! ما تضيع وقتك وإنت تقول لازم نثبت أسرائيليتنا لليهود عشان ما يسلمونا، وهاي موضة الوطنية اللي طالعه بالداخل كله وبالمثلث بشكل خاص هي السبب، لأ يا صديقي، والله لو تغني هتكفا كل يوم الصبح بتبقى بنظرهم عربي، مشكلتهم معك إنك عربي، كنت "طوف" ام لم تكن، مشكلتك في أصلك وما بحللك مشكلتك إلا انك تنولد من أول وجديد لأب وام من ريشون لتسيون، وأظنلك هاي صعبه شوي!
وأستمراراً لمسلسل النصايح اذا ما بدك تنقسم البلد وتصير جزء من أراضي السلطة (وما تتوقع يسألوك شو رأيك قبل ما يقرروا لأنك زي ما حكينا من قبل "عربي" ومش سويسري لسوء حظك) فالحل الوحيد قدامك إنك توّحد نضالك مع بقيت أولاد شعبك في كل فلسطين وتعمل على إسقاط حل الدولتين، وإذا بتفكرتتنصل وتقول السلطة بتمثلناش، آسف أقولك مش رح تزبط معك! لأنو بمثلوك وبمثلوا اللي خلفوك لما إسرائيل يصير بدها، هادا التنصل بس بزيدنا فؤية وما بوصلك لأشي، وما تفكرها صعبه عليهم، اللي هجّر مرة بهجّر مرتين، وما حدا رح يوقف معك أصلاً لأنو متنازل عنك أنت وأرضك، فرح تنحسب لصالحهم وصالح السلام.

أخيراً قضية اللاجئين، أو القضية الفلسطينية والأنسانية الأولى، من الواضح لكل عاقل إنو ضمن حل الدولتين عودة اللاجئين خيال علمي، يعني صدّق إنو في بالعالم سنافر بس ما تصدّق السلطة لمّا تقولك لا تنازل عن حق العودة، وين بدهم يرجعوا؟ على إسرائيل اللي بدها تخلص من المثلث بكل مساحته وأهميته عشان في عرب؟ على الحارتين اللي ضلّوا بالقدس؟ على القطاع المتفجر سكانياً وِلا على الضفة اللي الجدار عملها زي طنجرة الضغط؟ يعني لو كل محل من هدول أخدله عشرة ألاف بروح خمسين ألف! والباقي؟ طيب كيف بدنا نختارهم هدول الخمسين ألف؟ بنوزع على اللاجئين كروت يانصيب وبنعمل سحب!؟ مبروووك لقد ربحت معنا حق العودة الى وطنك! الرجاء التوجه لأقرب مكتب أونروا لأستلام جائزتك! هادا حكي فاضي وضحك على اللحى! بحل الدولتين اللاجيء ما اله غير التوطين او تشيلي وقرشين بدل ستين سنة تعتير.

ويبقى السؤال المطروح، الى متى؟ -هاي مقتبسة من مذيعين الجزيرة- لحد ما تعرفوا الله وين حاططكم، لا تستنوا ثورة ولا غيره، لأنو وللأسف إحنا مش تونس ولا مصر ولا غيرها من الديكتاتوريات العربية، يا ريتنا محكومين بالحديد والنار، حتى هاي الحجّه ما بنقدر نستخدمها، إحنا ويا خزاوتنا بين الشعوب بننتخب قيادتنا إنتخابات حره ونزيهه (القدس والضفة وغزة)، ما في حدا بطلعلوا يقول هدول مفروضين علينا! أحنا كمجموعة بنتحمل المسؤوليه عن أفعال هاي الناس، وإحنا اللي بنعطيهم الحق إنهم يفاوضوا بأسمنا، وإحنا اللي بنغمض عينينا وبنستهبل وبعدين بنقول: معقول وصّلت لهون؟ وبنساق بعضنا بدون وعي لتنفيس غضبه على "قناة الجزيرة لتحرير فلسطين"! قلبناها فتح وجزيرة ونسينا الوضوع الاساسي، بس للعلم، كل إعلام بالعالم إلو أجندة وكل سلطة سياسية بالعالم إلها أعداء بدورولها على نكشة بس هادا ما بعفيها من المحاسبة في حال مسكوا عليها هاي النكشة.

أنا شخصياً ما تفاجأت من موضوع الوثائق ومحتواها بس الأشي الوحيد اللي فاجأني وضحكني هو كلمة صائب عريقات: "بدكم شخص مبدع متلي". خمسة وخميسة، علقولوا خرزة زرقة اسم الله عليه، والله إنك خسارة فينا وبالوفد المفاوض، من بكره بتترك كل أشي بأيدك وركض على أول مكتبة، بتشتري ألوان وبتبدا ترسم، بدي تفجر كل إبداعاتك، الصبح رسم، الضهر بتعزف ساكسافون وبالليل رقصة باليه قبل النوم، حرام واحد مبدع زيك يضيّع حاله بالسياسة والمفاوضات، فنّك أبدى فيك، إنساك مِنّا بكره ما حدا فينا بنفعك.

خلاصته، شو ما يكون هدف الجزيره منيح إنها حرّكت هالمواضيع ورجّعتها للواجهة، وبالنسبة لكل اللي إنطرح بالوثائق أعتقد إنو المشكلة مش بالمفاوضات وإدارتها، المشكلة بالأساس اللي قائمة عليه، واللي مستحيل ينتج عنّه أفضل من اللي سمعتوه، البذرة من الأساس غلط، حل الدولتين باطل منطقياً وعم بضيع حقوقنا، وما بني على باطل فهو باطل، وبكرا بدوب التلج واليهود بياخدوا المرج وكل إبداع صائب عريقات وأستراتيجيات ياسر عبد ربه ما رح تفيدكم إذا ما لحقنا حالنا وعرفنا الطريق الصح.

أعطي الفن لفنانه لو أكل نصّه.

2010-11-10T13:50:00.000+02:00

"نشر في قديتا.نت"

لأيمتى بدنا نضل متلقيين؟ لأيمتى بدنا نضل رد فعل لغيرنا؟ لأيمتى بدّو يضل ميّة وخمسين بني آدم يزقفو لواحد واقف على المسرح؟ آن الأوان لتصحيح المعادلة، آن أوان الفعل، أجى الوقت اللي يطلعوا المية وخمسين على المسرح وينزل الواحد عن المسرح ويزقفلهم!

هاي مش خطبة عصماء، ولا إلها أي بُعْد وطني ولا فلسفي ولا غيره، ما تتعب حالك وتفكر برمزيتها، هاي حوار ذاتي داخلي عميق ومتأجج ومشتعل كمان! بيحدث بشكل دوري وبينتقل كالعدوى من راس لراس في كل نواحي الوطن وتحديداً في حيفا ورام الله.

ببساطة يا أعزائي نتيجة تمركز وتقوقع النشاط الثقافي والفني على أنواعه في هدول المدينتين صار عند أهلهم حالة من التخمة الفنية والثقافية خلتهم ينتقلوا أو بالأحرى يحاولوا ينتقلوا من خانة جمهور المبدعين ليصيروا همّه نفسهم المبدعين. إنو هالفنان بشو احسن منّا عشان يضل عالمسرح وإحنا بس بندفع تذاكر!

أعراض الظاهرة :

كثرة السرحانين والصافنين : بتمرق الصبح على الكافيه (القهوة) بتلاقي شخص محترم مالوش ولا إشي وما بعاني من أي مشاكل نفسية وعلى الرغم من هيك بكون داخل بصفنة نيرفانية رب ربك ما بعرف لوين واصل فيها! حالة تأمّل شنيعة لحفّة الرصيف اللي قدامه، لو بتنزل كاتيوشا بحضنه ما بتقطعها!

إنتشار كاميرات المحترفين: أسهل أنواع الأبداع من وجهة نظر المنتقلين الجدد لصفوف المبدعين هو التصوير الفوتوغرافي، كل من حضر معرضين على أربع مسرحيات تتخللهم أمسية فنية، بسحب حاله وبيشتريلوا كاميرا كانون او نيكون مع عدستين طوال بِلفّوا، أهم إشي يِلفّوا، هو شريها عشان يوقّف قدامك ساعة يلفلف فيها ويقولك شوي بس أزبط الزووم، قرب شوي عشان الفوكَس، ومعطيك الغمزة تبعت شايفك من الخُزُق تفكرنيش مش عارفِلها! وحياتي هي بتكون زابطة من اولها بس لازم إيده تلعب عالعدسة لزوم التفنن، يمكن تشوفوها ظاهرة تصلح للسخرية بس إذا بنشتغل عليها منيح وبنحضّر ملف عن الموضوع بثبت العلاقة الواضحة بين الفعاليات الفنية والثقافية وبين إرتفاع مبيعات الكاميرات الأحترافية، انا مستعد أقنع شركة كانون تصير الراعي الرسمي لمسرحي الميدان والقصبة.

تحول البيوت لأستوديوهات: البيت اللي ما إلو بالفن بحيفا أو رام الله بكون عنده بالقليله تلات آلات موسيقية (عود، جيتار، مزهر) هادول بيجو "بيلت إن" مع البيت، هلأ إذا حابب حضرتك تضيفلك ناي مثلاً على دف على طبل أفريقي كمان ما بضر، واكيد طبعاً في عندك في الزاوية ستاند خشب للرسم، وعلى الطاولة اللي جنبه محطوطه هاي الصينية تبعت سنفور رسّام اللي بخلط عليها الفنان الطفرَه ألوانه الزيتية اللي خربش فيها آخر إبداعاته. وصدقوني "التوقيع" الأشي الوحيد الفني فيها، بِشتغل على المضيه أكتر ما بشتغل عاللوحة، فعلياً هو مش شايف بكل اللوحة غير المضية، هي لوحة المضية أسمها، أما شو لوْحَة.. بتلْوِح لَوِح!

إستنساخ محمود درويش: كل خمسة متر في المناطق المذكورة اعلاها بتصطدم بنسخة محسنة عن درويش، كلّه بكتب –وأنا منهم- كلّه بحكي فصحى –أنا مش منهم- . بتلاقيه عالفيسبوك بيقولك (إشتقتك يا صديقي متى اللقاء)!؟ –يعني شو أفرقت إشتقنالك عن أشتقتك يا مميز- وطبعاً كل هدول المبدعين تركوا كل شي بدرويش وركزو على إنو مُبهم! بكتب الواحد فيهم خاطرة مش خاطرة على بال حدا من قبل وبصير يقرألك فيها ويطّلّع بعينيك ليشوف مدى إنبهارك وإعجابك، وفتحة تُمَك الهبلة اللي بتسويها لما تكون مش فاهم شو بصير، بفسرها صاحبنا على إنها ذهول ناتج من تفجّر مواهبه، ولحّق أيميلات عاد كل ما كتبله سطرين!

طبعاّ لسة في عندك الفرق الموسيقية والمسرحية والأصوات اللي طلعت فجأة وبكترة ولا طلعت الحنّون باول الربيع.

يا صديقي إنك تكون ذوّاق ومتلقي جيد وبتسمع موسيقى ملتزمة وبهمّك تحضر معرض فني، وبتفضل فيلم وثائقي هادف على افلام رامبو وبتقرأ بشكل شبه دائم هذا بحد ذاته تميّز، زي ما في فنان عادي وفنان متميز كمان في جمهور عادي وجمهور متميز، إنت مبدع كجمهور ولولاك فش مسرح ولا عروض ولا أفلام ولا غيره، خليك في موقعك، إتركك من هالصفنة، وإنساك من كلمة طاقة إيجابية وطاقة سلبية، هاي الكلمة لحالها بتعقدك، سيبك من الوحدة والتأمل، الصبح خود معك صبية إشربو القهوة وإضحكو، تبرعلك بهاللآلات لشي معهد –خلي الغيتارة حلوة للديكور- وأرميلي ألوان هالزيت بلاش يوقعوا عالسجادة يعجبولك على سماها، خليك بسيط وبلاها هاي "مبهم"، بطّل حدا "مبهم" عليك يا زلمة. شو بدك في وجع هالراس،الفنان والموهوب بتبين موهبته من أول أكم سنة فش حدا بتيجيه الموهبة على كَبَر، شو هي كاينه رسالة النبوة تيجيك عالأربعين! إسمعوا مني يا جماعة أعطوا الفن لفنانه لو أكل نصّه.

إكرام الشعب البليد دفنه

2010-11-10T13:44:00.000+02:00

"نشر في قديتا.نيت"

بقولوا عنا شعب عاطفي، مش قصدي الفلسطينية بس، لأ كل العرب عاطفيين، إنو تقول يعني العربي دمعته على خده ما بتنشف لا صيف ولا شتا!؟ شو دين ربه هالشعب العاطفي إلي نازل في بعضه دبح!؟ شو هالعاطفة الجياشة اللي بتخلي عراقي سني يفقع بنص اهله الشيعة ويقصف إعمارهم بيوم عاشوراء!؟ بحبهم ومش قادر ما يطّمن إنو وصلهم عالجنة واحد واحد!؟ وين كانت هالعاطفة الجياشة والسلطة بتدعس بقلوب اليسار والأسلاميين في سجون أريحا!؟ وإذا بتنسالي "من الحب ما قتل" بشو بتفسرلي الطخ بالركب والرمي عن العمارات اللي عملته حماس!؟ شو دين هالمحبة اللي بتخلينا ندبح بنت نامت مع واحد ونطخ بالهوى ونبارك للي قتل!؟ شو هالعاطفة اللي بتخلينا نمرق عن مخيم لاجئين معتّرين بلبنان وما نفكر نسمحلهم حتى يشتغلوا شغل محترم! هادا غير مرهفي الأحساس اللي كانوا يدبحوا بعض عالهوية.

إنو إحنا عاطفيين عشان الشعوب التانية بتقول أنا بدعم المرشح الفلاني، او بدعم سياسات الرئيس الفلاني وما بتستخدم كلمة "بحب فلان" لما بتحكي عن السياسيين وإحنا بنقولها!؟ فاتح قلبه شي مرة للي بقولك بحب صدام حسين؟ طيب ولنفترض جدلاً إنو بحبه، بعمرك قلتله إنو في مصطلح تاني أسمه بدعم سياساته ورفض يستخدمه؟ وبعدين دَعَم سياستة وِلا عنّه لا دعمها، شو اللي إختلف يعني؟ ممكن لا سمح الله رئيس عربي يتغير لو ما دعمها؟ أكيد لأ، هادا امر واقع، قضاء وقدر، بدك تتعلم تتعايش معه، وأفضل مراحل التعايش معه إنك تصير تحبه! إنو شو بدك أحسن من واحد بحب قضاءه وقدره! لما تحبه ببطل مفروض عليك، ببطل مطلعك عن دينك، بالعكس بصير حبيبك وضرب الحبيب زبيب. أقولك وخليه كرهه يا سيدي، شو بدو يستفيد غير القهر والمقت؟

لما تحب رئيسك هادا ما أسمه عاطفة، هذا سببه ميكانيزمات دفاع الكرامة المهدورة والضعف، إسأل مين ما بدك هاي هيك أعراضها بتيجي، حب من طرف واحد ومش عذري.

شعبنا عاطفي، هاي تلطيف لصفات أكثر صراحة زي : منقاد، غشيم، مش عارف الله وين حاطه ، بِنْضَحك عليه بكلمتين، بطيش على شبر مي، بِزقف للحيط الواقف. كل هادول ممكن، أمّا عاطفي؟ من وين لوين؟ من ايام الغزل العذري اللي كان يتغزل في بنت يمنعوه يتجوزها، قيس لعنوا أبوه بكندرة لما كتبله بيتين شعر في ليلى، ورجيني ربهم لهالعاطفيين هدول تبعونك! مات قهر الزلمة قد ما جماعته عاطفيين. أكم زلمه عربي بقول لمرته بحبك؟ أكم مراه بتسترجي تقول لجوزها إني ما بحس فيك وإحنا بنعمل سكس؟ طب بلاش هاي، أنو شعب عاطفي هادا اللي الرجال فيه ممنوع تبكي ولا حتى تدمّع؟ بكون ميت إبنه وبقولوله عيب عليك شد حيلك!هو مش عشان عيب يبكي بس هادا زلمة عاطفي يعني إذا بدا بُكى هات وقفه، فيها وجهة نظر برضه. يا جماعة هاي مش بس عاطفيه هاي إمعان بالعاطفة ما سبقنا إله ولا حدا إلا هولاكو وجنكيز خان إضّل اعماركم.

لما بتشوف إشي عالتلفزيون وبتقوم بتغضب وبتطلع مظاهرة وبعدين بتروح عالبيت وكأنّ شيئاً لم يكن، وما بتستمر بنضالك ولا بتغير إشي، ولا بتسقط حكومة، ولا بنجحلك إضراب ولا بنسحب سفير ولا بتحققلك مطلب. لما رئيسك بروح بفاوض القاتل وببيع بنص شعبك وبدعس على النص الباقي وانت تاني يوم بتروح عالشغل بعد المظاهرة اللي لا قدمت ولا أخّرت، هادا ما بسموه شعب عاطفي! هادا بسموه شعب بليد.. شعب ما بحس.. شعب صايبه زهايمر مزمن.. شعب بستاهل شو بصير فيه، هادا مش عاطفي هادا معطوف عليه!

وعطفاً على ما سبق من بلادة وقلة حيلة وفشل في خلق تغيير أو محاولة جعل تحسين حياتنا الدنيا هدف ولو تكتيكي، أنا أعتقد إنو ناس عاطفيين زينا ما بتستاهل وجه الأرض، باطن الأرض اولى فينا، ما إحنا منها واليها، وبنقتل عالشرف وبنحرق المسرح والسينما وبنتجوز أربعة وبنستورد ملابسنا الداخلية من الصين وبنحب الرئيس اللي كاتم على نفسنا أو مرات قاطعه بالمره عشان الهوا يكفي جماعته-الحق معه إحنا مش بس بنتنفسه للهوا وماكلينه كمان فبنسحب هوا اكتر من غيرنا- لشو نكون على وجه الآرض دخلك! خلينا تحتيها أحسن إلنا ولغيرنا، وهاي كمان حلينا مشكلة المفاوضات المباشرة وغير المباشرة ولمسة اليد والبلنتي، إحنا بناخد كل فلسطين تحت الأرض، وهمه بياخدوا فوق الأرض، بطلع معانا دولتين لشعبين –الحل اللي السلطة حالفة طلاق بالتلاتة ما بتتنازل عنه حتى لو كل اليهود بطلعوا من البلد- بكون في دولة أسرائيل القابله للحياة ودولة فلسطين القابلة للموت، وهيك الكل راضي ومبسوط. أي والله إكرام الشعب البليد دفنه.

ناس مصلحجية!!!

2010-10-29T19:29:00.000+02:00

انا بالعادة بحب أحكي قديش الأمة العربية عايشة بفترة تخلف وأنزل مسبات على وضعنا واخلاقياتنا ورجعيتنا، يعني غير إنو الموضوع مضايقني كمان سهل ومحبوب، كل الناس بتحب تسمعه ومريح لألها تفكر إنو خلص إحنا متخلفين وهادا هو، فش حل، بس هاي المرة بالذات إنتبهت على أشي منيح في الأمة العربية ولازم أحكي عنه!

من بين الأمم اللي حوالينا ..واللي مش حوالينا بس اجت وحطت جيشها فينا، إحنا الأمة الوحيدة اللي مش (مصلحجية)! عنجد بحكي إحنا ما عِنّا مصالح!! في عندك المصالح الأمريكية، المصالح التركية، المصالح الأيرانية، مصالح الأنظمة العربية، بس سامع بعمرك بالمصالح العربية؟ حدا عمره راعى المصالح العربية؟ إيران الها ناس ترعى مصالحها هون وأمريكا كمان.. وهدول بصيروا مبدأيين ومقاومين وهدول خَوَن، أو هدول إرهابيين وبدهم يجروا المنطقة لحرب والتانيين بسعوا لازدهار المنطقة ونموها الأقتصادي. وتركيا مش أحسن، تركيا بتحاول تسيطر على الأسلاميين بالمنطقة عشان تضغط على الأتحاد الأوروبي وبنفس الوقت علاقاتها التجارية والعسكرية مع إسرائيل مهمة وما بدها تخسرها، كله بلعب سياسة وبغلفها بمباديء عشان بالنهاية تتحقق مصالح أممهم اللي يستحيل بأي حال من الأحوال تكون منسجمة مع مصالح الشعوب العربية لأنها وببساطة ما بتتحقق إلا على حساب مصالحنا وأرضنا وثرواتنا ووحدتنا، على جثتنا يعني.

وهون ببرز بقوة تفوقنا الأخلاقي عليهم. إحنا أكبر من لعبة المصالح هاي وما بتهمنا كل هالمسخرات وسامحينلهم يلعبوا فينا وبأرزاقنا وقرارنا السياسي لأنو إحنا ولاده لحاتم الطائي والكرم لعبتنا، المسيح وتسامحه طلعوا من عِنّا –ورّثنا الخد الأيمن والأيسر وطلع على أوروبا يصنع صواريخ-، يعني إنت كعربي أصيل بيرضيك عشان شوية شغلات مادية ومعنوية تافهة..زي كرامة ونفط وقرار سياسي وتحرير ورفاه إجتماعي وهالحكي الفاضي يقولوا عنك مصلحجي!؟ أنا مني وعلي ما برضالك إياها!

فمرحبا بأوباما وساركوزي ونجاد وأردوغان، المصالح مصالحكم، أما إحنا فحقوقنا لله والوطن العربي للجميع.

عفن

2010-10-04T16:16:00.000+02:00

لو بنلاقي طريقة نقدر نجمّع هالعفن اللي على قياداتنا، عالأقل مرة بالشهر.. كان إحنا هلأ أكتر ناس بننتج بنسلين بالعالم!!

موزمبيق

2010-10-02T18:02:00.000+02:00

سمعت سمعة غريبة عن موزمبيق .. قال في موزمبيق ما بنفع تغير مهنة أبوك، يعني إبن الدكتور بطلع دكتور، أبن النجار بطلع نجار، إبن الفلاح بطلع فلاح.. إبن العرص بطلع رئيس!!! غريبة هالموزمبيق!!

حالياً عالأقل..بدّيش أتزوج!

2010-09-30T13:05:00.000+02:00

أصعب أشي تكون عزّابي وبنفس الوقت متفهم لرغبة أهلك الشديدة بالفشخرة فيك في كافة المحافل الأجتماعية وخصوصاً الأعراس. إنو أبوك وأمك ليش جابوك فكرك؟ غير التناسل وسُنّة الحياة وقديش كنت مسلّي وانت زغير وكل هالحكي، في هدف آخر للخلفة وما بقل أهمية عن اللي قبل.. ألا وهو الفشخرة! يعني بتتخيل إمك بتشك في قدرتك على إنك تسهر وتنبسط؟ أكيد لأ، بس بتجنن سماواتك عشان تقوم معها على عرس بنت خال جوز عمتك بحجة انها بدها إياك تنبسط وتغيّر جو! هي فعلياً مش مفرقه معها إنشالله عنّك ما سهرت. هاي كماليات بالنسبه الها، هي بتفرق عليها إذا بردت أو مرضت بس إذا سهرت أو لأ هادا آخر همها صدقني! كل ما في الموضوع أنو غير التوصيلة اللي رح تضمنها، بدها تدخل فيك عالعرس وهي معجوقة على قدرتها بأنها تخلف واحد طولك وتربيه ويكون معه رخصة وسيارة –مش عم بمزح هي بتفكره إنجاز موضوع السيارة هادا- لا وشو لابس بدله وجرافة ويمتاز بالوسامة الشديدة حسب إعتقادها الجازم واللي ممكن تقتل أمه لبراد بيت إذا قالت إنه إبنها أحلى منك.

إمك وهي داخله وإياك عزيزي الأبن على القاعة بتكون معجوقة ومبسوطة أكتر من يوم ما دخلت القاعة وهي عروس، وبتبدا عاد أكم مرأه يسلموا على أمك ويقولولها ما شالله هادا إبنك؟ يلا بدنا نشوفلوا عروس. هاي اللحظة تبعت "ماشاء الله هادا إبنك" هي اللي أمك جابتك عشانها، ولو بتفحص نسبة الأدرينالين في دمها بهديك اللحظة بيطلع أعلى من نسبة الأدرينالين في دم أنيستا لما جاب جول إسبانيا في كأس العالم. وانت طبعاً كأبن بار بوالديك مش رح تحرمها من هاي اللحظة حتى لو بدّو يلتعن أبونفسيتك بقيت العرس!

يمكن مش كل العزابية بوافقوني عاللي بقوله لأنو عزابي عن عزابي بفرق، أول شي إذا انت عزابي وبدوّر على عروس فالعرس المكان الأمثل لألك، بس إذا لأ، فأنت في جهنم لأكم ساعة. بعدين عُمْر العزابي بفرق. يعني عزابي بأول العشرينات لا يعتبر عزابي، اما إذا عمرك بآخر العشرينات أو أوائل الثلاثين فلازم تجهز حالك لحملة شعبية لتزويجك، بتبدأ من عند إمك وبتمر بقرايبك وبتنتهي بالصبايا اللي ممكن يشوفوك إمكانية عريس. اما إذا كنت بأواخر الثلاثينات أو أكتر فأنا ما بحسدك على وضعك بهديك الليلة من همس ونظرات تساؤل رح تشرّحك تشريح واللي ممكن توصل للتشكيك بتوجهاتك او قدراتك الجنسية واللي بتحب أهلك وبدها تكون من جماعة "إن بعض الظن إثم" رح تقول أكيد معمولّك عمل.

العزابي في مجتمعنا مُدان حتى تكسر إرادته ويتزوج، حتى الصبايا نفسهم اللي كانوا مستعدين يفوتوا معاك على علاقة مش معروف لوين بتوصل -زي ما كل علاقة المفروض تكون- ببطلوا يرضوا، يعني ممكن تتفقوا ممكن لأ. ممكن تكتشفوا إنو مش ملائمين وممكن تشوفوا إنو لسّه بدكم وقت أكتر مع بعض. هادا الحكي كله ببطل قابل للتطبيق لّما توصل آخر العشرينات. إنت المفروض إنك جاهز وشغلك منيح ولشو تضييع الوقت بالفحص وهالحكي الفاضي! هادا كله ببين بعد الزيجة. بهيك عمر إذا بتقول لصبية في قعدة مرحبا أنا فلان وبتحكي معها كلمتين تأكّد إنها بتكون صارت فاحصة كل إشي فيك وبدت تتخيل شكلك بالبدلة، وبتقدر يا صديقي إذا بتركز وبتكون القعدة هادية تسمع بالخلفية –خلفية راسها طبعاً- أغنية "دقو المزاهر يلا ويا اهل البيت تعالو" وعليه بدك تقرر في النص ساعة اللي رح تقعدوها إذا هي إم ولادك ولاّ هاي آخر مره بتشوفها فيها. لإنها مش مستعدة لعلاقة بدون جدول زمني واضح! زي إتفاقية خارطة الطريق بالزبط مع مراعاة إنو فش راعي أمريكي فبدك إطّبش راسك منك إلها!

نازلين تناضلوا لحقوق المرأة والمثليين والعمال وغيره، شو مع حقوق العازبين!؟ بدنا نطالب بإتحاد للعازبين يطالب بحقوقنا، وأبسط هاي الحقوق حقنا في تقرير المصير دون ضغط أو ثواب أو عقاب أو تهديد بالحرمان المجتمعي. وبدنا كمان تعفونا من الاعراس والمباركات بمواليد جدد وحفلات الطهور ويا ريت كمان تعفونا من التواجد في زيارات المعارف والأقارب اللي عندهم بنات في سن الزواج. وإذا بدي أتقّل دمي بالطلبات بلاها كلمة عقبالك. إذا سألتني شو أخبار حسني؟ وما حبيت أخبّي عليك وإضطريت أقولك إنوإتجوز،ساعتها قولّي.. بسيطة، معلش، مبروك، الله لا يردّه قول اي شي بس بحياتك بلاش عقبالك.

في النهاية إقتضى التنويه إنو إحنا العزابية مش ضد المرأة بالعكس، إحنا أكتر ناس محتاجينها في حال هي فهمت حاجتنا للعزوبية وشغفنا بأغنية "ما أحلى ليالي السهر وما أحلى العزوبية". تانياً واضح للجميع إنو كل كلامي عن العزّابية الذكور وهادا مش من باب الاستهانة بالعزابيات الصبايا –الله يخليلنا إياهم- وانا عارف إنو وضعهم أصعب، بس من باب التخصص فقط، يعني كل واحد يحكي عن حاله وتجربته الخاصة، فشوفولكم صبية تكتب عن معاناتكم وأنا أول المناضالين معكنَّ، وكمان بعرض عليكنَّ من هلأ توأمة بين إتحاد العازبين وإتحاد العازبات من أجل توحيد النضال، وختاماً بعد الأعتذار للحكيم "قد تستمر العزوبية مئة عامٍ وأكثر، فعلى قصيري النفس الزيجة جانباً".

صار عندي الآن منتخب

2010-09-30T01:22:00.000+02:00

مش رح اقدر أوصفلكم فرحتي لمّأ شفت الملصق الخاص بمباراة منتخبنا ومنتخب اليمن ضمن بطولة غرب آسيا والسبب طبعاً تشكيلة المنتخب الفلسطيني، هاي أول مره بحسّه منتخبنا مش منتخب الضفة وغزة، هادا المنتخب برد الروح حتى لو خسر مليون لصفر! منتخب لكل فلسطين.. لافرق فيه بين داخل وخارج ولاجيء إلا بالأداء، من القدس لأم الفحم لغزة لشفاعمرو للخليل للمخيمات كلنا موجودين، سخنين رح تشجع إبنها في منتخبه بنفس اللحظة اللي رح تهتف فيها كل غزة والصدى يوصل القدس مروراً بكل لاجئينا.

حانت اللحظة اللي نجتمع حتى لو على كرة! انا ما عم ببالغ بوصف الحدث، اللي بصير مش بسيط، اللي بصير هو تأكيد على فلسطينية كل من كان في فلسطين قبل الأحتلال بأعتراف إتحاد كرة القدم الفلسطيني التابع لوزارة الرياضة والشباب التابعة للسلطة الوطنية الفلسطينية التابعة للرئيس أبو مازن التابع.. عفواً المتواجد حالياً بأمريكا بفاوض علينا وعليهم –أي اللاعبين- والله يستر ما يوصلوا لأتفاق بنص المباراة على دولة بحدود ال67 بدون عودة لاجئين لأنو ساعتها رح يضل اربعة فلسطينية بالملعب والباقي فجأة بصير إما إسرائيلي (حسب حل الدولتين) أو دولي زي القدس او مش عارف الله وين حاطّه زي بقيت الفلسطينية اللي بالعالم وبالتالي رح يضطر الحكم أيقاف المباراة لأنو اللاعبين الفلسطينية اللي مسموحلهم يضّلوا بالملعب بصفّوا أقل من سبعة واللي هو ممنوع حسب لوائح الفيفا!

على الرغم من فرحتي بمنتخبنا بس هذا لا يمنع إنو منتخبنا الليلة أعطاني إمكانيات مهوله لتخيل المواقف اللي ممكن تصير لو ربطنا السياسة بالرياضة.. بس بتخيل منظر لاعب من غزة وهو واصل على مكان إقامة المنتخب بعمان وكله غبره.. مسكين جاي من الأنفاق ومبهدلينه المصريين ومشرشحينه الأردنيين وماضي على وثيقة نبذ الأرهاب أربع مرات عشان يوصل! وبشوفلك في هاي اللحظة لاعبين الداخل بدوروا على صفّة للمازدا 6 اللي جايين فيها على إعتبار إنهم الوحيدين اللي بقدروا ييجوا بالسيارة!

قولوا بسيطة المهم الكل وصل والحمد لله، هلأ بدهم يدخلوا الأستاد وهات أقنع الغزاوي بعد اللي صار فيه إنو يمرق من الممر تبع اللعيبة اللي بوصل للملعب لإنو بكون تحت الأرض!! يلا يا كابتن المباراة رح تبدا! وهو يقولك لا والله ربك ما بدخل كمان نفق لو شو ما يصير، ممكن ينهار إسألنا إحنا، طلعنا من غزة 15 واحد وصلنا تلاتة! مع وساطة شباب هالمخيمات والشتات بحملوا للزلمة وبدخلوا الملعب. طبعاً بالضرورة يكون الحكم مصري وحكم الراية قطري والحكم الرابع تركي عشان ما يصير أي خلافات بالمنتخب!

بدت المباراة والكرة مع القدسي، بيعطيها لللاجيء، بمررها للغزاوي، بحاول الغزاوي يعطيها للضفاوي بينقصهم التفاهم طبعاً فبتنقطع قدام المرمى، بمسكها اليمني وبينتظر أوامر زعيم القبيلة إذا مسموح يسدد.. بيتدخل فيها صمام أمان قضيتنا، المدافعين عن عروبة وفلسطينية خط ال18 تبعنا فلسطينية الداخل طبعاً وبياخدوها وبرجعوا الأمور لنصابها، في هاي اللحظة المنتخب اليمني بوقف اللعب وبعترض للحكم وبستنكر ومعه جامعة الدول العربية قيام منتخبنا بقطع كرة هدف محقق كانت رح تنهض بكرة القدم باليمن وشبه الجزيرة العربية! وإحنا بهاي الحالة بنصير قوى إمبريالية بتحارب نهضة المجتمع اليمني القبلي المتحضر!

هجمة من يمين الوسط بقودها أبن رام الله البطل، كل اللاعبين بساندوا بس هو مش راضي يمرر. على يمينه لاعب من غزة محاصر باربع لاعبين يمنيين واتنين فلسطينية والحكم المصري ! فش حلول بضطر يمرر للداخل، تمريرتين بالقدس وبتوصل للاجيء بهجم برضه من اليمين وبمشي فيها وبرفع لليسار، بس للأسف يسار الملعب ما في إلا لاعب واحد ومش فاضي يركض، حتى متمدد أخينا عالأرض وبحكي مع صحفي أجنبي عن تاريخه في اللعبة أيام ما كان اللعب على جهته! وبتضيع الكرة.

بترجع للمنتخب اليمني بتوصل نصف الملعب الفلسطيني، مقطوعة يثواني من أبن قلقيلية، بركض بالكرة خمسة متر وبوقف! شو القصة بحكي معه المدرب ولك أركض، أعطي، إعمل إشي ولكن بدون نتيجة ما قدر يستوعب إنو فش جدار والملعب مفتوح وإنتابته حالة فزَع تم تشخيصها بعد المباراة وتسجيل أول مرض نفسي بأسم الشعب الفلسطيني (فوبيا المساحات وحرية الحركة) تمنياتنا له بالشفاء وسرعة العودة الى الملاعب.

بتوصل الطابة للغزاوي بسددها عالية جداً من نصف الملعب، وكمان تسديدة مماثلة، التسديدة الأخيرة عملت خلاف حاد بين اللاعبين حول جدوى التسديدات العبثية! بتهدأ الأمور بعد تدخّل الحكم المصري! بتستمر المباراة وضربة حرة مباشرة لمنتخبنا! حائط الصد اليمني بتحضر. النص كابتن الغزاوي بجهز حاله لتسديده عشوائية .. في هاي اللحظات بتوجه النص كابتن اللي من رام الله لحارس مرمى المنتخب اليمني لإجراء حوار يقنعوا فيه بحقنا بإحراز هدف!! كل اللاعبين بنادوا عليه، يا كابتن تعال وقف معنا هون اللعبة، من هون بجيبوا الجوال مش من عندك! يا سيدي الفوتبول مش هيك! بس الله ما أقنعه، الزلمة متيقن إنو بالمخاجلة ممكن اليمني يسمحله يفوز! في هاي اللحظات الحاسمة من المباراة بسدد الغزاوي كمان تسديدة بالسما، بتنهي الشوط الأول بدون أهداف.

غرفة الغيار بتقلب طوشة على الأهداف وكيفية أحرازها وبتنفض الخيمة وبرجع كل واحد على بيته حتى بدون ما يلعبوا الشوط الثاني وبفوز المنتخب اليمني إدارياً.

سيبونا من السياسة الليلة كلنا ورا منتخبنا.. منتخب فلسطين .. كل فلسطين

الناس كانت مجانين يا ستي

2010-09-30T01:07:00.002+02:00

متلي متل كل شاب فلسطيني مقهور بحاول أرجع للماضي عشان احس في شوية كرامة من اي نوع!! حتى لو كرامة مهزومة, المهم فيها بطولة .. شو يعني إذا أنهزمنا بال48 , المهم إنو سيدي كان حامل بارودة وطالع عالقسطل مع عبد القادر الحسيني. وبال67 عم ابوي إستشهد وهو بدافع عن القدس.هادا هو المهم.. وبما إنو إحنا شعب ما بتهمّه النتائج على قد ما بهمّه الاداء يِبقى لا جُناح علي إني افتخر -واتفشخر كمان - بأبطال العائلة في هزيمتين ال48 وال67 العظيمتين.

طبعاً أحسن مصدر للمعلومات بهيك حاله هو ستي.. ستي اليافوية عندها ميزه عظيمة غير ذاكرتها القوية اللي مخلتيها تتذكر يافا بالبلاطة مع إنها طلعت منها وهي بنت 15 ولليوم مش قادره تنسى إنها مدنيّة وإحنا فلاحين وبِضّلها تعاير فينا ليل نهار من باب التذكير مش التعالي لا سمح الله!! هالميزة إنو ستي بتعمل من الحبة قبة.. وبصراحة هادا هو اللي بدي إيّاه بالزبط!!!

رحت عند ستي يوم جمعة الصبح.. عملتلي قهوة حلوة زي ما هي بتشربها مع إني ما بحب القهوة الحلوة. بس عند ستي كل إشي اله تبرير!! قال لازم تبدى نهارك بأشي حلو يا ستي عشان يكمل حلو.. هيك عنّا بيافا!! جابتها وقعدت تحكيلي عن أخبار العيلة زي دايماً وعن قديش كان سيدي زلمة منيح والناس تحسبله حساب وعن عادات أهلها بيافا وكرمهم , وأنا هون قلت هاي فرصتي.. سألتها : ستي شو صار بالحرب؟ قلتلي أي حرب؟؟ قلتلها الحرب ما غيرها ال48 وال67 ؟ وجهها تخربط وسكتت.. قلتلها ستي شو مالك؟ قوليلي شو صار بالحرب؟ قالتلي وإنت ليش بتسأل ؟ شو ذكرك هلأ!؟ قلتلها هيك حابب أعرف.. بس انا بعقلي كنت بفكر ليش ستي ما بدها تعمل من الحبة قبّة زي دايماً!؟ ما هي ما بتصدق تحكي بأي موضوع!!

بعد شوي اللي هي بتقلَي.. الناس كانت مجانين يا ستي.. قلتلها إذا مجانين وضاعت البلاد كيف لو أنهم أعقل.. قالتلي أه مجانين ونص!! كانوا يروحوا عالحرب.. حدا بروح عالحرب!!؟؟ وبعدين طالعين بفشك خربان والبارودة مره بطّخ وعشرة لأ.. هادا أسمه هبل!! اليهود أجو علينا معهم بواريد بطّخطخ عشر فشكات مع بعض! هادا كلّوا صياح فاضي يا ستي!! لما دخلوا علينا اليهود حماتي رمت البواريد بالبير! وزلام الحارة إنصفّت زي النسوان وهي حاملة الخِرَق البيض.. شو بدك تعرف أكتر!؟ ودارت وجهها بطريقة إنو خلص بديش احكي.

انتوا بتعرفوش ستي.. عشان هيك مش رح تفهموا صدمتي.. ستي بتحب تعيد القصص.. بتحب تكبّر كل إشي.. إنو أبوي مرة حمل بلاطة شايش وطلع فيها عالسطح وهو ماسك السلم بإيد وحده كانت بالنسبة إلها بطولة وقصة بتنحكى وبتنعاد ألف مرة بدون ما تزهق.. وبكون بعينيها لمعة وهي تحكي بتحسسك إنو أبنها عمل أسطورة! أما حرب كاملة ورجال العيلة بقاتلوا وبستشهدوا هادا كلوا ما حرك خيالها ولا دغدغ مشاعر الفخر عندها هاي كانت غريبة علي.

مع الوقت صرت أكبر وأفهم ستي.. ستي خسرت أهلها! وإنهد بيتها! ونامت هي وولادها بمغارة وخافت على جوزها وبالأخر بتلاقي اليهود محملين كل زلام الحارة خرق بيض.. في هيك حالة ستي ما قدرت تشوف أبطال! ستي واقعية أكتر منّا. البطل عندها هو اللي قدر يطلع الشايشه على السطح. أذا جرب يطلعها وما قدر ووقع هو والشايشة عن السلّم بالنسبة لستي بكون مسكين. ورح تبهدلوا كمان لأنو كسر الشايشه. عند ستي إذا إنت مش قد الأشي ليش تتزلمن وتعمله؟ ها هيك كسرتها للشايشة شو إستفدنا . معاها حق.. ستي بتشوف النتائج مش النوايا. عند ستي كل ملوك العرب زي بعض. عبد الناصر بفرقش عن الملك فاروق مادام التنين إنهزموا.

كل فِرق العالم بتروح على كأس العالم عشان تفوز حتى لو كانت جزيرة صغيرة. إلا العرب بروح عشان المشاركة المشرفة. انا ما سمعت بقوانين الفيفا عن إشي أسمه مشاركة مشرفة!

بتخيل أجى الوقت نبطّل نمجّد المهزوم. اجى الوقت نطّلع على النتائج مش النوايا. كل قياداتنا من اصفى نيّة فيهم لأوسخ نيّة فيهم – اه اه حتى هذا اللي عم بتفكّر في أسمه هلأ.. زيهم , لا مش غير عنهم صدقني- كلهم وصّلونا لهون! كلهم مهزمين.
الهزيمة ما فيها أبطال!! فيها ضحايا ممكن. فيها مواقف مشرفة ممكن جداً.. فيها موتة مقاوم وموتة جبان بوافقك. بس فش قائد بطل مهزوم.. فش بالتاريخ الألماني إشي أسمه القائد رومل بطل هزيمة العلمين!! كلهم كسروا الشايشة وكلهم سكتّوا ستي اللي بتحب تحكي وكلهم لازم التاريخ يحاسبهم.